Gaer stel ich uch oze raod van ellef veûr:                                                                 

Jao de Moêzevângers hebbe ouch ‘ne raod van ellef, naw eigelik hebbe vae beej de Moêzevângers ‘ne raod van 29 met ‘ne Senator Theo Stals en ‘ne vorst Geert Fleuren. Inne raod zitte beej os 4 dames en 25 hieëre, die allemaol eur beste beinke veûr zette.  Hieël völ minse weîte neet waat ‘ne raod eigelik allemaol deut, in en um ‘t vastelaovendj sezoen, as allein sleum kieke op ‘t podium. Dit zeen hieël uuteinloupendje take, van ‘t organisieëre van ‘ne Sinte Merte houp tot gast dame zeen op ’t preense-treffe, van ‘ne kiosk opbawwe tot ‘n glaeske beer tappe, van verkieër regele tot ‘t organisieëre van activiteite enz enz. Mer ouch zeker um lol en plezeer uut te straole as vae d’r same met oze groeëte man (preens vanne Moêzevângers) op uut trekke nao ânger vereiniginge um dao ‘n fieësje te bawwe, en jao det leste det kin deze raod waal. Vae trekke d’r in ‘t sezoen ouch vaak opuut of eigelik zoeë dek asj gieët, leefst met de vlagge maegdjes en ‘n muziekkepèl um dan met ‘n houp tamtam binne te kome. Ein sterk pûnt van oze raod és, det vae elkaar acceptieëre, aod, joônk, dik, dun, man of vraw det maaktj neet uut, en eder klasjenieërtj met d’ein d’ânger, en det és de kracht van oze raod. Vae gaon as vae d’r in ‘t sezoen op uuttrekke met de bus, zoeëdet ederein e pötje beer kan drînke en ouch weer veilig thoês keumptj. En ein dînk moog ich waal verklappe, as vae dan met de bus weer trök kome op Laor ésj beej Henk nog EINE drînke, mer meistal löktj det neet, want dan ésj dao zoeë baere gezellig.  

Zeen d’r manne of vrölley die deenke, waw dao zoeëj ich, ouch waal ‘s mej op uut wille trekke of ich wil eigelik ouch iets beteîkene vör de vastelaovendj op Laor. Schaamtj uch neet en gaotj lekker ‘ne kieër met os mej.   

Alaaf.