Waat ‘n ieër en waat bin ich gruuëts det ich dit jaor veurop moog gaon as de preens vanne Moêzevângers. Kej sjiek!
Ich zal mich mer ‘s ieërst ff veurstelle vör degene die mich nog neet kinne. Ich bin Preens Hubert I. Ich bin 36 jaor aod. Ich woeën oppe Rietstraot, bienao aan ‘t indj en eigelik hieëlemaol veuraan.
Ich heb ‘n vriendin, en det és Roos Koppen, zeuj woeëntj nog beej heur pap en mam oppe boorderi-j in Tungeler. In ‘t daagliks laeve wêrk ich in Wieërt beej Van de Kruijs. Dao zit ich veurnamelik oppe graafmachien. Soms waal us ‘ne tractor of ‘ne vrachtwagen mer veural inne zandj. Dao naeve heb ik nog wat hobby’s want des ouch belangriek, ‘ne mins mot oppe tiêd ontspanne neteurlik toch. Ich gaon gaer e pötje beer drînke met mien vriendjes en vriendinnetjes, en ich doon gaer us ‘n keugelke scheete beej de schutteri-j, wao beej ich komendj jaor ouch nog us Keuning bin. Verder doon ich gaer allerlei dingen organisere. Ich bin bestuurslid beej de vastelaovendj vereiniging, zit inne raod van ellef, en doon gaer înkele stökskes mej speule en organisere beej de boonte aovendj. Verder gaef ich ouch nog edere zoondigmêrge zwumles aan wichter met ‘n beperking. En as ich dao dan ‘s mêrges e bitje duf aan kom nao ‘ne lange zaoterdignacht en die wichter met völ energie en lol d’r zeen, jeh dan zeejje mej weer fit. En dan doon ich neteurlik met hieël völ plezeer de jeugd op Laor begeleiden. Wie sjiek is det um met die kids völ waeke op ri-j fieëst te veere en lekker te kuiten, Kej sjiek. Ich bin dit jaor extra bli-j det d’r zoeë ‘n top team as jeugdbegeleiding is, (Bibian, Daniek, Janou en Joost, red.) dan kan ich met ‘nn gerösj hert ‘n stepke minder doon (zal moeilik zeen). Verder bin ich ouch al us preens gewaesj beej vv Gaer Heej. En met al dae vreeje tiêd dae ich dan nog over heb gaon ich gaer wat leuks doon met mien maegdje!
Neteurlik kwame ze mich vraoge um Preens te waere, mer zoeë as det jullie al gelaeze hebbe, ich bin neet zo völ thoês, dus ‘t haaj wat aan um mich te treffe. Mergood, met ‘n smoes waas ich thoês. Monique zooj ff langskome over de dansmarietjes, en tjeh.. Jan mos wat aafgaeve beej mich… det die twieë noow per toeval tegeliek beej mich ware en hun ouch van de begeleiding zeen, tjeh… wis ich völ. Jan bedacht zich neet en zat metein de steek op miene kop, en ‘t einige waat ich zei waas: “Jao uiteraard!”. Daonao begos ‘t wachte, tjonge waat heb ich lang motte wachte zégk… pfff ‘t waas pas Oktoeber 2021….. De jeugd ging det jaor waal door, mer ich mos helaas nog ‘n jaor wachte. Mergood noow moge vae en vae gaon d’r dan ouch met kej völ zin d’r tegen aan! Ich mos neteurlik nog ff naodeenke over mien adjudante, mer ich deenk det ich dao good in geslaagdj bin. Aod Preens Mark (2017 preens beej de Moêzevângers) same met zien maegdje Fanny, Dennis (aod adjudant van Mark) same met zien maegdje Floor, Bob samen met zien maegdje Linda en Simone (aod adjudant van Mark) same met heure vreendj Robbert
Vae weense dan ouch ederein ‘ne geweldjige Vastelaovendj! En det ónger mien devies:
Grave en zwumme doon ich gaer en met ‘n fieësje is niks mis,
Mer de vastelaovendj op Laor is ’t allerschoeënste waat ’r is!! Alaaf!!!
