Aojers vanne Broêd

Ich bin Jan Peeters, van Jaan van Frien van ‘t mènke en van Lien van de Houteling. Ich bin geboeëre op Aovert, op Luuëke opgegruùtj en woeën al mieër as 40 jaor tieëgenover de schoeël aan de promenade van Laor.Ich bin 65 jaor, getrâwtj met José en vae hebbe 3 wichter, 5 kleinkindjes en 2 bonus klein-kindjer. Dus as die allemaol beej os zeen, esj volle bak en altieëd gezellig. Doeër de waek bin ich 3 daag te veênge beej Coolen Engineering in Heytse. Dao haoj ich mich met völ plezeer bezig met zaeg-, dre-j en fraes-wêrrek van metaal. In miene vri-je tieëd wandel en zwùm ich gaer en inne zoeëmer tour ich lekker met de motor. Auch zit ich gaer met ’n pilske röstig toeës. Met völ plezeer daon ich dit jaor mej met de Boorebroêleft, vae gaon d’r ’n schoeën fieëst van maken!

Ich bin Elianne Moonen, dochter van Jan van Franse Theu en Elly van de Wout Renkens.

Ich bin vriendin vör ut laeve van Nuël van den Hurck, moôder van 3 super schoeën wichter. De aodste es al de deur uut, det es oeës Tom en dae woeëntj in Mestreecht oppe Vriëthof en es dokter. De middelste es oeës Sam, dae woeëntj nog toeës beej os oppe zölder, det es un schoeën gelegenheid um doeër te sparen vör ‘n eigen stekkie. In ‘t dageliks laeve es hae bâwvakker. De jongste in hoeës es oeës Hanneke, die nog waal effe beej os moôg blieëve woeëne. Hèt es bezig met ‘n studie aan de Rooi Panne in Eindhoven en as dejae ‘m gaer aan ‘t wêrrek zeêtj dan ki-jae altieëd ‘n hèpke gaon aete beej Prego oppe Oelemêrrentj of ‘n fieëstje met belaeve beej de Dröppelkes op Luuëke woeë hèt in ‘t bestuur zitj en preensebegeleidster es. Vae woeëne samen oppe Brandstraot nummer ellef met oeëze hoônd Bumper. Det es det bieëstje waat op echt eederein stieët te blaffe dae langs dörftj te koome. De mieëste mînse op Laor en Laorvèltj kinne mich nog as juffrouw oppe schoeël van Laor. Ieërst hieël wat jaore beej Hoera inne kinderopvang en daonao as juf in groep dre-j. Sinds twieë jaor wêrrek ich 4 daag inne waek as lieërkracht op ‘t Palet in Wieërt. Dao gaon ich eêdere daag gaer haer. Wie schoeën es ut um eêdere daag weer zoeë te kinne geneête van ut gru-je vanne wichter inne klas. In miene vri-je tieëd bin ich verder gaer bezig met bloômschikke, zeênge beej de Streetsingers, laeze, knutsele en frutsele, wichter-fieëstjes organisieëre, koôke op ‘t zoeëmerkamp van scouting Hubovra, zit ich inne organisatie van ‘t muusjesfieëst, zwum ich beej DSO oppe zoondigmêrrege en eêdere zaoterdig stök ich mich uut beej Fit 20. Jèh en dan moôg ich auch nog wat vertelle oeëver mien beênging met Laor en met de Moêzevângers. Oeëts esj begonne doeër met de wichter op Laor de vastelaovundj te koôme veêre umdet ‘t op Bosseve te drök waor met die kleîntjes. En op Laor Beej Bertje dao waasj prachtig veûr ze. Renne, spreênge en dânse. Ut waas auch beej Bertje op Laor woeë ich Nuël heb lieëre kinne, tieëdes ‘n bôrebroêleft met as broêdegom Rob Smeets met zien bruûdje Sandra Aendekerk. As gezin hebbe vae al hieël wat schoeën jaore moôge belaeve beej de Moêzevângers. Preens Nuël de ieërste, de raod van elluf en de Aod Preense Club (OPC) , Jeugdpreenses Hanneke de ieërste, Sam inne boorefemiêlie beej jubileum broêleft van Truus en Wiel Wijen, Tom as broêdegom met Femke Stals as zieën broêd, Hanneke as getuuge van broedegom Daan Ras saame met bruûdje Isa Zentjes van ut jeugdboôrepaar.Verder bin ich actief gewaesj in ut bestuur vanne Moêzevângers, ut muuskesfieëst, de moezejacht op vastelaovundj maondig, opnòw opstarte vanne Loarder Muuskes, jeugdgroep de Moezevalkes en neteùrlik neet te vergaete al die schoeën jaore as saxofoon speulster beej kapel Klink Klaor.