Boonte Aovendj!
‘ne Groep minse di-j bestieët uut verschillendje laeftiêde, völ ideeë, mer vörâl völ lôl en plezeer, en des woeë ‘t um drejt!
‘t Ieërste weekend nao de 11e van de 11e ésj zoeë wiêt, de Boonte Aovendj van Laor. ‘n Schoeën weekend woeë–in allemaol leuke sketches waere gepresentieërdj, woeë vae maondje op gestudeerdj hebben.
Direct nao de zomerverkânsie kome vae as ”artieste” beej–ein en dan heet Wim, de regisseur, alle tekste al klaor. Van te veûre és d’r ‘n klein gruûpke al ff mej bezig, dae de aovendj in elkaar zetj. Stiekem zeejje d’r gewoeën ‘t hieël jaor door mej bezig. In augustus kome vae dus beej–ein en dao spraeke vae alles door, weem wêlke rolle heet en waat edereîn mot zégke, oeëts waertj d’r nog wat aangepasj mer over ‘t algemein stiêd alles al vast. Edere woonsdig waertj ‘r vervolgens geoefendj. Behalve de woonsdig mette kêrmes, want dan mot ederein ‘ne oliebôl gaon aete en veurwêrk gaon kieke inne stad neteurlik. Now ésj dék gezellig met oefene, met de nuuëdige hépkes en drênkskes, dus aaf en tow hejje nog wöl’s ‘ne aovendj d’r tösse zitte det d’r neet völ gebeurtj as lache en stomme knauwel verkoupe. Mer edere kier as vae dan nao hoês gaon nao ‘ne drökke aovendj, kome dao dan toch de verstendj–ige weurd van oze regisseur Wim: Lieërtj eure tekst! Mer met bezeuk van de decorbawwers, schminksters en oze filmer woeë vae ouch nog ‘s allemaol filmkes mej opneme keumptj ’t good! De leste waek és dan ouch u’n waek woeë–in vanalles gebeurtj, de pékskes hânge klaor, de pruûke staon opgesteldj, de headsets staon aan en de schmink keumptj op ‘t gezicht. De decorbawwers zörge vör ‘n schoeën aangekledje bühne, zoeëdet alles dan op zien plaats völtj. En dan de aovendj zelf. De spots staon aan, de tekst zitj in ‘t köpke, de spanning és te völ mer vae hebbe deindânger! Met ’n natje en droogje prebeêre vae dan ouch de zenuwe te óngerdrökke. Mer met vörâl völ lôl en enthousiasme trappe vae de Vastelaovendj van Laor aaf! En as dejje dan op de bühne staotj en gae zeetj de lachendje gezichte en gae kriegtj ‘n groeët applaus, jeh, dao doojje ‘t dan vör! Hopelijk zeen vae uch nog völ jaore kome!
Groetjes, de artieste van Laor”
