Jeugdpreenses Lotis 1e
Ich bin preenses Lotis den ieërste, dochter van mien mam Valerie van Rosalie van Bèr en Drina van Daenen-Willem van Mart van Sjeng vanne Slagter en Truus van Wienandje en dochter van mien pap Ad dae opgegrujdj es in Ell en zoeën es van Maria uut ‘t Kielegat en Jozef uut Budapest. Daorum miene schoeëne achternaam dae uut Hongarije keumtj.
Letj GOOD op, want ich zeg um mer eine kieër: … Miene achternaam es … Görög!
Ich bin 11 jaor aod, mer vuuër det dieze Vastelaovendj verbeej es bin ich 12 gewoeëre. Same met mien pap, mam en mien allerleefste groeëte zöster Amber woeën ich oppe Husseve oppe Husserverwieëg. Meîster Thijs es miene meîster van Groep 8 op IKC Laor. Ich heb ‘t heej herstikke nao miene zîn met de rest vanne klas, lekker völ knutsele en buurte. Mer hoêswêrk … dao doon vae de komendje waeke neet aan … hè meîster Thijs! In miene vri-jjetiêd bin ich völ te vînge oppe manege van Laor woeë ich neet allein gaer paerdri-j mer ouch völ vriendinnekes heb. Thoeës schîlder en teîken ich gaer. Ouch heb ich ‘n nejmesjien en maak mét mien zöster leuke dinger. Dânse doon ich gaer beej ‘t Showteam vanne Loarder Muuskes. En ich bin dol op mien kniênkes Mickey en Beauty. Kort gezagdj, ich knutsel, frutsel, haoj van alle bieëstjes én gaon gaer nao alle fieëstjes. En daorum es mien orde:
DE ORDE VAN ‘T CREATIEF FIEËSTBIEËST!!
Ich bin verieërdj det ich dit jaor dé Jeugdpreenses vanne Moêzevângers moog zeen. Met de jeugdvorst, adjudantes, de hiele Raod van Ellef, miene groeëte collega en alle minse van Laor en daoboete make vae d’r ‘n knallendje Vastelaovendj van! Noow det ich mich vuuërgesteldj heb laot ich uch wieëte:
- Ten 1e: Det ich vanaaf vandaâg eindelik nao zoeëlang wachte uch moog vertelle det ich de noowe jeugdpreenses van V.V. de Moêzevângers bin.
- Ten 2e: Det ich heej de ieërste Jeugdpreenses bin met ’n schoeëne steek én vaere oppe kop.
- Ten 3e: Det vae flînk gaon sprînge en dânse tot de Vastelaovendj vurbeej es. Mer ich mot uch waarschowwe… ‘T wurtj ‘n lânk sezoên dit jaor, dus waat zulle vae völ spierpien hebbe!
- Ten 4e: Det ich twieë waeke nao de Vastelaovendj geboeëre bin en det ich nog in mien mam ziene dikke boêk mej heb gefieëstj. Meschiens es ‘t daorum det ich zoeë vanne Vastelaovendj haoj.
- Ten 5e: Det vae d’r ‘n hieël sjiek fieëst van gaon make zoeëdet vae dit noeëts mieër gaon vergaete.
- Ten 6e: Det ich neet allein mét mien gevolg, mer ouch mét de groeëte Preens en zien gevolg d’r ‘n groeët fieëst van gaon make.
- Ten 7e: Det ich mich ontzettendj verhuuëg um mét de hieële Jeugd oppe ker te staon inne groeëte optocht vanne Basisschoeël.
- Ten 8e: Det ich gruuëts bin det ich al jaore zelf ‘n Muuske bin en weît det de Muuskes good kinne fieëste.
- Ten 9e: Det alle wichter van Laor nao ‘t Muuskesfieëst motte kaome zoeëdet ‘t ein groeët fieëst gieët waere.
- Ten 10e: Det vae tot laat doeër wille fieëste in oos Moêzepeliês… dus Henk en Marlies, gaeftj dae sluuëtel mer, vae sloête de tênt waal aaf!
- Ten 11e: Det ich altiêd wil aafsloête met mien devies:
GALOPPERENDJ DE VASTELAOVENDJ IN, FIEËSTJ MEJ MÉT GOOJ ZÎN!
