Getuùge van ut Broêdspaar

Home / Algemeen / Getuùge van ut Broêdspaar

Emma Beerens

Ich bin Emma Beerens en bin 22 jaar aod. Ich bin ’n dochter van Rogee en Sonja Beerens Verstappen. Saame met mien aojers en braor Sven woeën ich op Budschop. Mien pap keùmtj oorspronkelijk uut Blieërick en es dus unne echte ‘Wortelepin’. Os mam keùmtj uut de Pieël en is dus unne ‘Turfstaeker’. Ich wêrrek inne zörg beej de Paters oppe Beest. Dit daon ich met völ plezeer. Mien hobby’s zeen leuke dinge doan met vriendinnen, sporten en wandelen met de hônd. Ich bin op Laor terechtgekaome via miene vreêndj Danny Stals dae inne Road van Elf zitj beej de Moêzevângers.

Nicole Leveau

Ich bin Nicole (Colleke) Leveau. Dochter van Annie (van Bocken Harrie en Toke Schreurs) en Jo (van Sjeng van Leveau en Truke George). 50 jaor geleeje geboore oppe Heerweg op Laor.

Ich bin getrâwdj met Peter en vae woeëne oppe Booldersdieëk in Neejwieert. Vae hebben 3 wichter: Cis, Emmy en Loet. Deej hebbe alle 3 eure basisschooltieëd op Laor op school gezaete. Cis waas gruuetse adjudant van jeugdpreens Juul. Emmy zoot inne Jeugraod met Jeugdpreenses Iris en Jeugdpreens Caspar. Ozze Loet is neet zoeën fuifnummer, dae vongdje met un zekske chips in un hukske Beej-Bertje tiedes de wichtermiddige. Hae speuldje later dan weer waal met os ammaol meij beej de Vastelaovendj Maondjig Middig Kepel.

Dan zeen vae auch pleegaojers van Aubrey. Ze is 8 jaor en hultj van verkleije en fieëste. Dus die kin neet wachte tot ut vastelaovendj es. Vur mien wêrrek begeleid ich boetelandse scholiere tösse de 14 en 18 jaor, die in un gastgezin verblieëve. De aafgeloupe jaore hebbe vae zelluf auch unne scholier in hoeës gehadj: dit jaor woeëntj Ema uut Tsjechië beej os.

Ich speùl hobo (o.a.) beej Hermenij St. Joseph 1880 saame met os hieël gezin en ich ving ut auch nog herstikke leuk um te kooke en eigelik nóg leuker um te aete… Ut meest geniet ich van een groeëte taofel met gezellige minse, heerlijk aete en feine muziek.

Ich veul mich verieërtj um dit jaor getuùge oppe Borebroêleft te zeen en ich zal dan auch mien best doon um ut Broêdspaar zoeë good meugelijk beej te staon!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

  •  
    Previous Post

    Aojers vanne Broêdegom