Leef Moêzevângers en Moêzevângerinnekes,
Waat sjiek det de Moêzevângers mich gevraogdj hebbe um dit vastelaovendjsezoên preens te waere. Ich bin Frank van den Heuvel en mét de vastelaovendj gaojje mich nog dék tieëgekaome as Preens Frank I. Ich woeën mét mien maegtje Brenda en oos wichter Noor en Roan oppe Kransakker op Laorveldj. Brenda kumptj zjuust wi-j ich van oeërspróng uut Ni-jwieërt.
Mien aojers Frans en Wilhelmien zulle völ minse waal kinne. Di-j zeen al hieël wat jaor beej de Moêzevângers en gaon altieëd gaer mét de vereîniging op paad.
As d’r op Laor wat te doon is vör de wichter dan zeen vae mét z’n alle d’r beej. Noor zitj beej de Laorder Muuskes en dânsj dit jaor beej de Maxis. Ze gieët ’t leefst dânse as opa Frans ouch in de zaal bezig is vör de vereîniging. Roan gieët mej as dette zien preensemöts op moog en ziene mântel um kan doon. Hae mot allein waal nog un paar jaörkes wachtte alieër hae jeugdpreens kin waere.
In ‘t daagliks laeve wêrk ich beej Dura Vermeer. Ich haoj mich dao bezig mét ‘t bawwe van weege, spoorliêne en dieêke. In ‘t bezûndjer zörg ich d’r vör det de aafwatering good wurtj geregeldj zoeëdet vae d’r geîn last van hebbe as de raengel mét bakke uut de locht véltj. Dae watergolf in mien óngerscheiding kumtj dao vanaaf.
As hobbie speul ich door ‘t jaor trompet beej hermeni-j Sint Joeëzef 1880 woeë ich gaer un schooën stukse meziek mej maak. Mét de vastelaovendj speul ich al mieër as dertig jaor beej kepèl De Vâlse Loef. De toeëne deej ich beej de kepèl speul zeen aaf en tow neet hieëlemaol zuûver en daorum heb ich de orde van de Valse Toeter ingestêltj.
Vae gaon gaer mét os veere op verkânsie of un lânk weekend weg mét de caravan, as dejjae in de zomer over de Kransakker louptj dan zeeje ouch geregeldj unne caravan beej os oppe oprit staon. In de wîntjer gaon ich gaer nao de snieë um een paar daâg te skiee.
Mét de vastelaovendj hebbe vae geine tiêd um op verkânsie te gaon. Vae gaon dan mét VV De Höffers op stap um same vastelaovendj te vere. Eeder jaor beginne vae al oppe tiêd mét ‘t uutzeuke van een schooën pekske. En mét de vastelaovendj zelluf höffe vae ut glaas, zeenge vae, danse vae en make vae lôl.
Mien gevolg bestieët uut de adjudânte Eric Driessens mét Nathalie, Bernd Meijs mét Nancy en Chris Schreurs mét Marisca. Same gaon vae d’r alles aan doon um d’r mét uch un kei-j schoeën fieëst van te make.
Ich wîns aedereîn unne schoeëne vastelaovendj en gaon d’r van uut det vae uch dék zeen in ‘t moêzepeliês. En det ónger mien devies:
Mét dees daâg drînke vae gein water mer beer. Vae höffe ‘t glaas, zînge, danse en make plezeer!


