Getuùge

Ich bin Cindy,

van Franske van het Valkennest en Jet vanne de Aspergeboer en Piet en Til aan de Averbodeweg te Sterksel. Ich bin geboeëre en opgegruùtj in Sterksel samen met mien broôr Erik en zus Anne. Inmiddels woeën ich alwieër 8 jaor samen met Joeri en os wichter Sem en Suus oppe Korenaar op Laorvèltj. 4 daag vanne waek gaon ich met völ plezeer nao B2B Online in Eindhoven um d’r vör te zörrege det de planning en financiën op rölkes laupe. Al van jongs af aan, handbal ich beej HB Lido, woeë ich eêder waek op zoondig nog met hieël völ plezeer op ’t vêltj staon. Dao beej bin ich dèk op zaoterdig mêrrege in ’t bos te veênge um met ‘ne gezellige groep ’n eûrke te sporten beej Sano training & coaching, um daonao doeër te vleêge richting SV Laor um Sem aan te moedigen langs ’t voetbalveltj. Os wichter gaon nao schoeël op Laor en nôw ’t vastelaovundj seizoen es aangebroeëke, zuldje Suus auch weer zeen schitteren op ’t podium beej de Laordermuuskes. Neteùrlik waor ich zieër verieërtj det ich gevraogtj woôrt doeër de broêd as getuuge en vae gaon d’r samen met zien alle ’n schoeën fieëst van maken!

Ich bin Vincent van Lierop,

Zoeën van Frans, Boôkhaojer vanne “Carte Blanche” van Tjeu van Husseve (nôw de Maasenweêg) en Maria van Deurzen (Badjuffrouw), van Nies van Buul. Ich bin geboeëre in Wessem aane Maas, mer umdet mien Pap trök woeëj nao Wieërt, zeen vae op mien 7dje weer heej kaome woeëne. Um precies te zeen op ût Luuëke van ‘de Zweeloeere’ en as dejae ut nog precieser motj weite, oppe Vlaaipunt.
In de afgelaupe jaore heb ich vervolgens zoeë ongevieër hieël Wieërt gehâtj. Ich ging van Luuëke noa de stad, vanne stad noa de Graaswinkel, vanne Graaswinkel met unne umweêg via Rooj noa Loarvèltj, van Loarvèltj met unne umweêg via Altwieërtj noa Groenewoud en van Groenewoud nao Loar. As dur dus eine ervaring hieët in ut woeëne in Wieërt dan bin ich ut waal. En ich kan uch dus nôw auch zônger umweêge zegke: heej op Loar woeëne, is ut allerfeinst!
En dan mien gezinssituatie…
Ut zal uch inmiddels neet mieër gehieël verbaaze mer auch heej heb ich weer unne umweêg in genoeëme. Noa völ viêve en zesse bin ich namelijk trök uutgekoôme beej ut maegdtje woeë ich pakweêg 15 jaor gelieëje al tot oeëver mien oeëre verleêfdj op waor: Maud Smeets.
Vae woeëne saame oppe Doskesakker met mien dochter Lizzy en zoeën Lex en de wichter van Maud: Liene en Koen. Vae hebbe dus un moderne situasie, ut is altieëd drök mer gelökkig mieëstal auch baere gezellig.
Ich wêrrek beej IAI. Det is un bedrieëf det machines leêvertj um oeëver de hieël wèrreltj paspoorten te maake. Met ânger weûrt: ich zit de hieële daag achter unne computer. In miene vreêje tieëd kloeët ich gaer wat aan en as dejae dèk verhoeësj hejae auch altieëd waat te klusse dus det keumtj goôd uut. Verder ren ich gaer un rùndje umme kêrrek, en dèk wat wieëter, bin ich unne echte femiêlieman dae hultj van gezelligheid en snuîke, en auch zeûk ich hiel gaer dinge op. As d’r vanaovundj dus nog mînse inne zaal zeen die gaer wat wille weîte, ge moôgtj mich altieëd effkus koôme opzeuke.