Broêdspaar 2025 Tom & Joyce
Ich bin Joyce
Van Henk van Nelleke van Karelkes Feej en Carla van Lies van Valkenswieërt. Mam es geboeëre in Braobèntj mer dao hueërdje niks mieër van en die kan plat kâlle as de beste. Ich bin opgegruùtj aan de ângere kant van ’t kanaal, in Wieërt Zuid, woeë ich samen met mien aojers en aojer zus oppe Graasweênkel heb gewoeëntj. Nao wat umzwervingen binne en boeëte Wieërt bin ich zoên 7 jaor gelieëje op Laor belântj. Samen met Goof en os wichter Owen (10) en Zoë (7) woeën ich met hieël völ plezeer oppe Rakerstraot “in ut witte hoeës naeve ’t Naoleveldje”. Dankzij de contacten op ’t schoeëlplein enne aanlaûp van vriendjes en vriendinnetje vanne wichter, veùle vae os hieëlemaol toeës op dit schoeën Laor. Ich wêrrek 4 daag vanne waek beej Land van Horne as teamleider oppe ICT aafdeiling. Ut es un luxe um met völ plezeer en auch nog ’s oppe fiets nao ’t wêrrek te kinne gaon. Naeve wêrreke stieët ’n gemiddeldje waek toch veural in ’t teîken van sporten: ich gaon 2 kieër inne waek kickbokse, train en coach ut handbalteam van Zoë, moedig Owen en de rest van de JO11-1 van SV Laor aan en gaon gaer nao de hieëre van HV Rapiditas of unne ângere sportwedstrieëd kieke. Verder haoj ich van laeze en meziek loêstere, hiken inne Alpen, borrelen met vrîndje en vriendinnen en hêllep ich mej ’t Muusjesfieëst te organiseren (schrieëftj 22 fibberwari 2025 vast inne agenda!).
Ich bin Tom Ghijsen, geboeëre in Rommelgat (Veldhoven) en op mien nuuëgendje same met os pap en mam en mien broôr Roel verhoeësj nao Wieërt, trök nao woeë mien aojers geboeëre zeen. Groeët gewoôre oppe Molenakker en nòw woeën ich op Laorvèltj (dus altieëd aan de gooje kant vanne knaâl geblieëve).
Os pap, Peter Ghijsen, es geboeëre oppe Kloeësterstraot en es op zien veêrdje met zien femiêlie verhoeësj nao Eindhoven. Dao kwaom hae in zien twintjiger-joare os mam tieëge, ’n maegtje van Verspagen. Dochter van Annie op den Buijs (vanne pannendekker vanne Remùndsje-weêg) en Sjaak Verspagen (zoeën vanne beruchtje veldjwachter Kuubke Verspagen). Mam es geboeëre en getoeëge oppe Dr. Poelstraot en later vör de studie nao Eindhoven verhoeësj en dao os pap tieëge ’t liêf gelaupe.
Ich woeën oppe Vlaskam 9, ’t schoeënste streùtje van Laorvèltj. Same met mien vrâw, Merel de Graef, dochter van Eddie de Graef (‘ne èchte Pietaf) en Ryan Geelen (‘ne putter), en mien twieë joônges: Moos van 10 en Daaf van 8. Ich wêrrek beej Pro Rail, woeë ich verantwoeërdelik bin vör ôngerhaod en tieëdige vervanging vanne spoôre. As ich neet aan ’t wêrrek bin, fiets ich gaer ’n rùndje doeër ’t Wieërter bos oppe mountainbike, pôngel ich wat aan in hoeës, dreênk ich gaer ‘n pîlske met mien kammeröäj of staek ich de barbecue aan. Mer waat ich ’t allerleêfste daon is tieëd doorbreênge met mien wichter en lekker boeëte zeen.
