Borebroêdspaar 2024

Home / Algemeen / Borebroêdspaar 2024

Broêdspaar Mariëlle en Danny

Ich bin Mariëlle Geuns-Gitmans. Mien pap en mam zeen opgegruùtj aan de ângere kant vanne Maas, in Belfeld.

’n Jaor of 35 gelieëje zeen ze verhoêsj nao Rooj. Dao heb ich eine lange tieëd same mèt mien zusje beej ôs pap en mam gewoeëntj. Mèr sinds bekàns 12 jaor woeën ich mèt völ plezeer op Laor tegenoeëver de leste halte vanne buurtbös! Ich woeën dao saame met Stefan en oos wichter Eva (un Laorder Muuske) en Bram.

 

Ich bring völ tieëd doeër in ’t VieCuri om dao te gaon wêrreke as verpleegkundige op de leukste aafdeiling, namelijk Chirurgie. Saame met mien collega’s oeës best daon om eeèerein weer gezoônd nao hoeës te laote gaon es dan auch oôs doel. Mèr auch saame gezellige dingen daon veênge vae fein en dao bin ich dan auch gaer beej.

As ich neet hoof te wêrreke bin ich gaer same mèt de wichter en Stefan. Bin un echt familiemins zoeë as dejae det zegtj. Boete dieës passies heb ich d’r nog eine en det es de saxofoon. Eèdere donderdig gaon ich nao Rooj om dao saame met de fanfare te rippetieëre aan de meist uùteinlaupendje en uùtdagendje meziek. Tieëdes de vastelaovendj maak ich dan auch gaer meziek mèt de Grenskapel en neteurlik Klink Klaor. Meziek det zitj in mien gene en die heb ich doeërgegaeve!

 

Saame mèt vrindje bin ich auch neet vies van ein fieëstje. Same eine dreênke en dânse, det ving ich sjiek. Dit jaor gaon ich det fieëstje met uch allemaol viere as Borebroêd vanne Moêzevângers op 27 jannewari.

Ich bin Danny Stals van Jan van Reinkus Thjeu en Anny van Piet vanne Iesvogel oet de Laak. Ich bin 24 jaor aod en geboeëre en opgegruùdj oppe Coumushoeve aan de Muùlewaeg 95.

In miene vreeje tieëd dre-j ich gaer wat plaetjes as diskjockey en bin ich lid van Schutteri-j St. Antonius Ni-jwieërt. Met vastelaovundj zit ich beej de Road van Elf op Laor. In ’t dagelijks laeve wêrrek ich beej mien braor as loeënwêrreker. Heej haoj ich mich veural bieëzig met de containerverheùr: bèkskes plaatse en ophalen met allerlei grôndstoffe. Daonaeve maak ich aich nog gaer tieëd vreej vör mien vriendin Emma, die dit jaor mien getuùge es oppe Borebroêleft vanne Moêzevângers.

Kòtj allemaol nao de kêrrek en daonao nao Bertje veur dit schoeën vastelaovundjs-fieëst op 27 jannewari!

 


Geef een reactie

Het e-mailadres wordt niet gepubliceerd. Vereiste velden zijn gemarkeerd met *

  •  
    Previous Post

    Getuùge van ut Broêdspaar